(ຂປລ): ວັນທີ 1 ກຸມພາ 2013 ທີ່ ກະຊວງຖະແຫລ່ງຂ່າວ, ວັດທະນາທຳ ແລະ ທ່ອງທ່ຽວ ໄດ້ມີພິທີມອບເຄື່ອງຊ່ວຍເຫລືອລ້າ ຈາກ ສປ ຈີນ ໂດຍການປະ ຕິບັດ ການ ຮ່ວມ ມື ທາງດ້ານ ວັດທະນາທຳ ລະຫວ່າງ ສປປ ລາວ ແລະ ສປ ຈີນ. ເຄື່ອງທີ່ນຳມາມອບໃນຄັ້ງນີ້ ປະກອບມີ ຄອມພິວເຕີຕັ້ງໂຕະ 3 ຊຸດ, ຄອມພິວເຕີໂນດ ບຸກ 3 ຊຸດ, ເຄື່ອງ ຈັກ ອັດ ສຳເນົາເອກະສານ 2 ຊຸດ, ເຄື່ອງພີມເອກະສານ 3 ຊຸດ, ເຄື່ອງສະແກັນ 5 ຊຸດ, ເຄື່ອງດົນຕີ 23 ຊຸດ, ກະເເຊດລ້າງຫົວເທບ 20 ມ້ວນ, ເຄື່ອງຂັດພາບພິມສຳລັບວຽກງານວິຈິດສິນ 2 ຊຸດ, ເຄື່ອງອຸປະກອນສຳລັບວຽກງານວິຈິດສິນ 100 ຊຸດ ເພື່ອປະກອບໃຫ້ແກ່: ກົມຮູບເງົາ, ກົມວິຈິດສິນ, ກົມສິນລະປະ ການສະແດງ. ລວມມູນຄ່າ 300.000 ຢວນ (ສະກຸນເງິນຈີນ) ໃຫ້ກຽດມອບໂດຍ ທ່ານນາງ ປູ ຈ້ຽນ ກົວ, ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳ ສປປ ລາວ ແລະ ໃຫ້ກຽດຮັບໂດຍທ່ານ ສຈ. ດຣ. ບໍ່ແສງຄຳ ວົງດາລາ, ລັດຖະມົນຕີວ່າການກະຊວງຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ, ມີບັນດາຫົວໜ້າກົມ, ຮອງກົມ ອ້ອມຂ້າງກະຊວງເຂົ້າຮ່ວມ.
ໃນໂອກາດນີ້ ທ່ານລັດຖະມົນຕີວ່າການກະຊວງ ຖວທ ກໍໄດ້ສະແດງຄວາມຂອບອົກຂອບໃຈ ຕໍ່ກະ ຊວງວັດທະນະທຳ ສປ ຈີນ ກໍຄື ສະຖານທູດ ສປ ຈີນ ປະຈຳ ລາວ ທີ່ ໄດ ້ໃຫ້ ການຊ່ວຍເຫລືອ ເຊິ່ງເຄື່ອງດັ່ງ ກ່າວນີ້ ຈະເປັນການປະກອບສ່ວນອັນສຳຄັນໃຫ້ແກ່ວຽກງານ ຖະແຫລ່ງຂ່າວ, ວັດທະນະທຳ ແລະ ທ່ອງທ່ຽວ ທັງເປັນການ ເສີມຂະ ຫຍາຍ ສາຍ ພົວພັນ ແລະ ການຮ່ວມມື ລະຫວ່າງ ສປ ຈີນ ແລະ ສປປ ລາວ ໃຫ້ນັບມື້ນັບແຕກດອກອອກຜົນສູງຂຶ້ນເທື່ອລະກ້າວ./.
