ອົງການການຄ້າໂລກຕິດປະກາດ ສປປ ລາວ ເປັນສະມາຊິກສົມບູນອັນດັບທີ 158
(ຂປລ): ເລີ່ມແຕ່ວັນທີ 26 ມັງກອນ 2013 ນີ້ເປັນຕົ້ນໄປ, ອົງການການຄ້າໂລກ (World Trade Organization ຫລື WTO) ໂດຍມີສຳນັກງານໃຫຍ່ຕັ້ງຢູ່ນະຄອນເຊີ ແນວ ປະເທດສະວິດສ ໄດ້ຕິດປ້າຍປະກາດຖະແຫລງວ່າ ສປປ ລາວ ເປັນສະມາຊິກສົມບູນອັນດັບທີ 158 ຊຶ່ງຈະມີຜົນຢ່າງເປັນທາງການນັບແຕ່ວັນທີ 2 ກຸມພາ 2013 ເປັນ ຕົ້ນໄປ.
ການປະກາດດັ່ງກ່າວມີຂຶ້ນພາຍຫລັງທີ່ກອງປະຊຸມສະໄໝສາມັນຄັ້ງທີ 4 ຂອງສະພາແຫ່ງຊາດ ສປປ ລາວ ຊຸດທີ 7 ໄດ້ໃຫ້ສັດຕະຍາບັນແກ່ອະນຸສັນຍາວ່າດ້ວຍການເຂົ້າເປັນສະ ມາຊິກອົງການການຄ້າໂລກ ຂອງ ສປປ ລາວ ເມື່ອວັນທີ 6 ທັນວາ 2012 ແລະ ການຍື່ນສານສັດຕະຍາບັນສະບັບລົງວັນທີ 21 ທັນວາ 2012 ຕໍ່ກອງເລຂາອົງການ ການຄ້າ ໂລກຢ່າງເປັນທາງການໃນວັນທີ 3 ມັງກອນ 2013 ໂດຍ ທ່ານ ຢົງ ຈັນທະລັງສີ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ປະເທດສະວິດສ ແລະ ເປັນຜູ້ຕາງໜ້າຖາວອນ ແຫ່ງ ສປປ ລາວ ປະຈຳຫ້ອງການອົງການສະຫະປະຊາຊາດ ແລະ ອົງການຈັດຕັ້ງສາກົນອື່ນໆ ທີ່ເຊີແນວ. ປ້າຍປະກາດດັ່ງກ່າວ ໄດ້ຖືກຕິດຢ່າງຍິ່ງ ໃຫຍ່ ແລະ ສະຫງ່າຜ່າເຜີຍຢູ່ທີ່ສຳນັກງານຂອງອົງການການຄ້າໂລກທີ່ເຊີແນວ ຊຶ່ງຈະດຳເນີນໄປຈົນຮອດວັນທີ 9 ກຸມພາ 2013.
