ສົນທະນາທົ່ວໄປ

   ທ້າວ ແອ­ນ້ອຍ ອາ­ຍຸ 18 ປີ, ປະ­ຊາ­ຊົນ​ບ້ານ​ສົມ​ຫວັງ​ເຫນືອ ແລະ ທ້າວ ມາ­ລາ​ວັນ (ລັ່ງ) ອາ­ຍຸ 24 ປີ ປະ­ຊາ­ຊົນ​ບ້ານ​ຫາດຊາຍ​ຂາວ ເມືອງ​ຫາດ​ຊາຍ​ຟອງ ນະ­ຄອນ­ຫລວງ​ວຽງ​ຈັນ ຖືກ​ເຈົ້າຫນ້າ­ທີ່​ກັກ​ຕົວ​ໃນ​ຂໍ້​ຫາ​ລັກ​ຊັບ​ພົນ ລະ​ເມືອງ, ຜ່ານ​ມາ​ພວກ​ກ່ຽວຕ້ອງ​ໂທດ​ມາ​ແລ້ວ​ໃນ​ຂໍ້​ຫາ​ຢາເສບ​ຕິດ, ລັກ​ຊັບ​ພົນ­ລະ­ເມືອງ ແລະ ເຄີຍ​ຖືກ​ບຳ­ບັດ​ທີ່​ສູນ​ບຳ­ບັດສົມ​ສະ­ຫງ່າ.

   ຕາມ​ຄຳ​ໃຫ້­ການ​ຂອງ​ພວກກ່ຽວ​ຕໍ່​ເຈົ້າ​ຫນ້າ­ທີ່​ໃຫ້​ຮູ້​ວ່າ: ໃນວັນ​ທີ 16 ກຸມ­ພາ 2013 ເວ­ລາ 13:00 ໂມງ ທ້າວ ແອ­ນ້ອຍ ໄດ້ມາ​ຊວນ​ເອົາ​ນາງ ເມ (ເຊິ່ງ​ເປັນເພື່ອນ​ຍິງ​ສາວ) ໄປ​ຊ່ວຍ​ວຽກ​ຢູ່ເຮືອນ​ດີ​ຂອງ​ພີ່­ນ້ອງ​ຂອງ​ຜູ້­ກ່ຽວບ້ານ​ນາ​ໄຫ ເມືອງ​ໄຊ​ເຊດ​ຖາ ນະ­ຄອນ­ຫລວງ​ວຽງ​ຈັນ ເມື່ອ​ໄປຮອດ​ເຮືອນ​ດີ​ກໍ່​ປະ​ໃຫ້ນາງ ເມ ຢູ່​ຊ່ວຍ​ວຽກ. ສ່ວນ​ຜູ້­ກ່ຽວ​ໄດ້​ໄປຊວນ ທ້າວ ລັ່ງ (ຫມູ່) ກັບ​ຄືນ​ມາ ຫ້ອງ​ເຊົ່າ ນາງ ເມ ບ້ານ​ຫນອງໄຮ ເມືອງ​ຫາດ​ຊາຍ​ຟອງ ນະຄອນ​ຫລວງ​ວຽງ​ຈັນ ເພາະ­ວ່າ​ຜູ້ກ່ຽວ​ໄດ້​ເຄີຍ​ໄປ​ຫລິ້ນ​ຢູ່​ຫ້ອງ​ເຊົ່າ ນາງ ເມ ຕະ­ຫລອດ ແລະ ສັງເກດ​ເຫັນ​ວ່າ​ຫ້ອງ​ຂ້າງ​ມີ​ເງິນ ເລີຍ​ວາງ​ແຜນ­ທີ່​ຈະ​ເຂົ້າ​ໄປ​ລັກ ເພື່ອ​ຫວັງ​ເອົາ​ຊັບ​ສິນ, ເມື່ອ​ມີເງື່ອນ­ໄຂ​ກໍ່​ສວຍ­ໂອ­ກາດ​ຕອນ​ທີ່ໄປ​ສົ່ງ ນາງ ເມ ລົງ­ມື​ປະ­ຕິ­ບັດຕາມ​ແຜນ­ທີ່​ວາງ​ໄວ້ໃນ​ເວ­ລາ​ປະມານ 16:00 ໂມງ ພວກ​ກ່ຽວ​ກໍ່ໄດ້​ພາ­ກັນ​ຫາ​ວິ­ທີ​ໂດຍ​ໃຊ້​ເຫລັກງັດ​ປະ­ຕູ​ດ້ານ​ຫລັງ​ປະ­ມານ 5 ນາ­ທີ ກໍ່​ສາ­ມາດ​ເຂົ້າ​ໄປ​ເອົາ​ສາຍແອວ​ທອງ​ນາກ 2 ເສັ້ນ, ສາຍແອວ​ເຫລັກ​ເຄືອບ​ເງິນ 2 ເສັ້ນ, ໂທລະ­ສັບ​ມື​ຖື 1 ເຄື່ອງ, ເຄື່ອງ ຟັງ​ຫູ 1 ຊຸດ, ເຄື່ອງ​ປະ­ດັບ​ຕ້າງ​ຫູ 1 ຊຸດ ແລະ ເງິນ​ໂດ​ລາ​ສະ­ຫະ­ລັດ ຈຳ­ນວນ 19 ໂດ​ລາ ທີ່​ເຈົ້າ​ຂອງເກັບ​ມ້ຽນ​ຢູ່​ໃນ​ຕູ້. ຫລັງ​ຈາກ​ນັ້ນ, ກໍ່​ເອົາ​ເຄື່ອງ​ທັງ​ຫມົດ​ໄປ​ເຊື່ອງໄວ້​ທີ່​ເຮືອນ​ຂອງ ທ້າວ​ລັ່ງ, ແລ້ວຜູ້­ກ່ຽວ​ກໍ່​ກັບ​ມາ​ຮັບ​ເອົາ ນາງ ເມ ເມືອ​ສົ່ງ​ຮອດ​ຫ້ອງ​ແຖວ, ຈິ່ງ​ໄດ້ຖືກ ປກສ ບ້ານ​ຫນອງ​ໄຮ ກັກຕົວ​ສົ່ງ​ໃຫ້​ກອງ​ບັນ­ຊາ​ການ ປກສ ເມືອງ​ຫາດ​ຊາຍ​ຟອງ​ດຳເນີນ​ຄະ­ດີ.

   ສ່ວນ​ຂອງ​ກາງ​ເຈົ້າ​ຫນ້າ­ທີ່ສາ­ມາດ​ເກັບ​ກູ້​ຄືນ​ໄດ້ ແລະ ມອບໃຫ້​ເຈົ້າ​ຂອງ​ເດີມ​ເປັນ​ທີ່​ຮຽບຮ້ອຍ​ແລ້ວ, ສ່ວນ​ຜູ້​ຕ້ອງ​ຫາ​ທັງ 2 ແມ່ນ​ຍັງ​ຢູ່​ຫ້ອງ​ຂັງ​ລໍ­ຖ້າ​ການສະ­ຫລຸບ​ສຳ­ນວນ​ຄະ­ດີ​ຂອງ​ເຈົ້າຫນ້າ­ທີ່ ປກສ ເມືອງ​ຫາດ​ຊາຍຟອງ ເພື່ອ​ສົ່ງ​ຟ້ອງ​ສານ​ຕັດ­ສິນຕາມ​ລະ­ບຽບ​ກົດ­ຫມາຍ.