ສົນທະນາທົ່ວໄປ

 ລາ­ຄາ​ນ້ຳ­ມັນ​ລົງ​ເປັນ​ຄັ້ງທຳ​ອິດ ພາຍ­ຫລັງ​ທີ່​ມີ​ການ​ປັບຂຶ້ນ 3 ເທື່ອ​ຕິດ­ຕໍ່​ກັນນັບ​ແຕ່​ວັນ​ທີ 22 ມັງ­ກອນ​ຂອງ​ປີ​ນີ້​ເປັນ­ຕົ້ນ​ມາ.

   ບັນ­ດາ​ນັກ​ຂັບ​ຂີ່ ແລະ ຜູ້​ຊົມໃຊ້​ຫລາຍ​ຄົນ​ທີ່​ໃຫ້​ຄວາມ​ສຳ­ຄັນກັບ​ລາຍ​ຈ່າຍ​ຈາກ​ການ​ຊື້​ນ້ຳ­ມັນໃນ​ແຕ່​ລະ​ວັນຄົງ​ຍິ້ມ​ອອກ​ພາຍ­ຫລັງ​ລັດ­ຖະ­ບານ​ປັບ​ລົງ​ລາ­ຄານ້ຳ­ມັນ​ຮອບ​ນີ້ ເຊິ່ງ​ຢູ່​ນະ­ຄອນຫລວງ​ວຽງ​ຈັນ ແອັດ​ຊັງ​ລົງ​ເຖິງ 200 ກີບ ແລະ ກາ​ຊວນ 210 ກີບ​ຕໍ່​ລິດ ສາ­ມາດ​ຊ່ວຍ​ປະ­ຢັດລາຍ​ຈ່າຍ​ໄດ້​ອີກ​ລະ­ດັບ​ຫນຶ່ງ.

   ການ​ປັບ​ລົງ​ລາ­ຄາ​ນ້ຳ­ມັນ​ຄັ້ງນີ້​ຂອງ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ກໍ່​ເຊັ່ນ​ດຽວ​ກັນ​ກັບ​ຄັ້ງ​ຜ່ານໆ​ມາ​ຄື​ເຮັດ​ໃຫ້​ສະພາບ​ການ​ຊື້-ຂາຍ​ນ້ຳ­ມັນ​ຢູ່​ບ້ານເຮົາ​ມີ​ຄວາມ​ສອດ­ຄ່ອງ​ຕາມ​ກົນໄກ​ການ​ປ່ຽນ­ແປງ​ຂອງ​ລາ­ຄານ້ຳ­ມັນ​ເຊື້ອ​ໄຟ​ໃນ​ຕະ­ຫລາດ​ໂລກ ເຊິ່ງ​ເລີ່ມ​ມີ​ຜົນ​ນັບ​ແຕ່​ເວ­ລາ 6:00 ໂມງຂອງ​ມື້­ນີ້​ຄື​ວັນ​ທີ 6 ມີ­ນາ 2013.

   ສຳ­ລັບ​ລາ­ຄາ​ໃຫມ່​ມື້­ນີ້​ນ້ຳມັນ​ຂາຍ­ຍ່ອຍ​ຫນ້າ​ປ້ຳ​ຢູ່​ນະ­ຄອນຫລວງ​ວຽງ​ຈັນ ແອັດ​ຊັງ​ທຳ​ມະດາ​ແມ່ນ​ເຫລືອ 10.610 ກີບ​ຕໍ່ລິດ ລົງ​ຈາກ​ຄັ້ງ​ກ່ອນ 200 ກີບ, ສ່ວນ​ແອັດ​ຊັງ​ພິ­ເສດ 11.740 ກີບ ແລະ ລາ­ຄາ​ກາ​ຊວນ 9.400  ກີບ​ຕໍ່​ລິດ; ໃນ​ເວ­ລາ​ດຽວ​ກັນ​ຢູ່ແຂວງ​ຄຳ​ມ່ວນ​ຈະ​ຂາຍ​ໃນ​ລາຄາ​ແອັດ​ຊັງ​ພິ­ເສດ​ທີ່ 11.740 ກີບ, ທຳ​ມະ​ດາ 10.650 ກີບ, ກາ​ຊວນ​ລິດ​ລະ 9.450 ກີບ. ດ້ານ​ແຂວງ​ສະ­ຫວັນ​ນະ​ເຂດແອັດ​ຊັງ​ພິ­ເສດ​ລິດ​ຫນຶ່ງ 11.860 ກີບ, ທຳ​ມະ​ດາ 10.660 ກີບ ແລະ ລາ­ຄາ​ກາ​ຊວນ 9.450 ກີບ​ຕໍ່​ລິດ.

   ພາກ​ໃຕ້​ຢູ່​ແຂວງ​ຈຳ­ປາ​ສັກແອັດ​ຊັງ​ພິ­ເສດ​ຂາຍ​ອອກ​ລິດຫນຶ່ງ 11.860 ກີບ, ທຳ​ມະ​ດາ 10.650 ແລະ 9.440 ສຳ­ລັບລາ­ຄາ​ນ້ຳ­ມັນ​ກາ​ຊວນ.

   ສ່ວນ​ພາກ​ເຫນືອ​ທີ່​ແຂວງບໍ່​ແກ້ວ ລາ­ຄາ​ແອັດ​ຊັງ 10.730 ກີບ, ກາ​ຊວນ 9.510 ກີບ​ຕໍ່​ລິດ, ມາ​ທີ່​ແຂວງ​ຊຽງ​ຂວາງ​ລາ­ຄາແອັດ​ຊັງ​ລິດ​ຫນຶ່ງ​ຂາຍ 10.850 ກີບ ແລະ 9.570 ກີບ ສຳ­ລັບ​ນ້ຳມັນ​ກາ​ຊວນ.