ອີງຕາມແຫຼ່ງຂ່າວຈາກ ນສພ ປກສ ສະບັບວັນທີ 5 ກຸມພາ 2014 ໃຫ້ຮູ້ວ່າ: ວັນທີ 4 ມີນານີ້ ຄະນະສານອາຍາປະຊາຊົນຂັ້ນຕົ້ນ ນະຄອນຫຼວງວຽງຈັນ ໄດ້ຕັດສິນລົງໂທດປະຫານຊີວິດ ນາງ ພັນ ອາຍຸ 35 ປີ ແລະ ທ້າວ ຊຽງຂາວ ອາຍຸ 41 ປີ (ຄູ່ຜົວເມຍ) ຢູ່ບ້ານດ່ານຊ້າງ ເມືອງໄຊທານີ ນະຄອນຫຼວງວຽງຈັນ ໃນສະຖານຄ້າ-ຂາຍຢາເສບຕິດ.
ສຳນວນຄະດີໃຫ້ຮູ້ວ່າ: ໃນວັນທີ 11 ກໍລະກົດ 2011 ທ້າວ ຂົນ ຫຼື ກູດ ໄດ້ເດີນທາງໄປເມືອງຫ້ວຍຊາຍ ແຂວງບໍ່ແກ້ວ ເພື່ອຈະໄປຊື້ຢາບ້າມາຂາຍໃຫ້ກັບເຖົ້າແກ່ ເມື່ອໄດ້ຢາບ້າມາແລ້ວ ທ້າວ ຂົນ ກໍ່ລົງມານະຄອນຫຼວງວຽງຈັນ ແລ້ວພັກຢູ່ເຮືອນພີ່ນ້ອງຊື່ທ້າວ ວັນທອງ ຢູ່ບ້ານໂຄກສີວິໄລ ຈາກນັ້ນ ຜູ້ກ່ຽວກໍ່ນຳເອົາຢາບ້າ ຈຳນວນ 27 ມັດ ໄປເຊື່ອງໄວ້ຢູ່ສວນແຄມໜອງປາຂອງທ້າວ ວັນທອງ ມາຮອດວັນທີ 18 ກໍລະກົດ 2011 ທ້າວ ຂົນ ແລະ ນາງ ພັນ ໄດ້ຕິດຕໍ່ຫາກັນເພື່ອເອົາຢາບ້າອອກມາຂາຍ ຫຼັງຈາກນັ້ນ ທັງສອງຈຶ່ງຕົກລົງໃຫ້ນາງ ພັນ ເປັນຄົນມາພົບເຖົ້າແກ່ ເບິ່ງເງິນທີ່ເຖົ້າແກ່ຈະເອົາມາຊື້ຢາ ເມື່ອເຫັນເງິນແລ້ວ ນາງ ພັນ ຈຶ່ງໄດ້ໂທລະສັບບອກທ້າວ ຊຽງຂາວ (ຜູ້ເປັນຜົວ) ເອົາລົດກະບະຍີ່ຫໍ້ໂຕໂຢຕ້າ ວີໂກ້ ສີປອນທອງ ເລກທະບຽນ ກຍ 2387 ກຳແພງນະຄອນ ມາໃຫ້ ແລະ ບອກໃຫ້ທ້າວ ຊຽງຂາວ ຢູ່ລໍຖ້ານຳເຖົ້າແກ່ ແລ້ວນາງ ພັນ ຈຶ່ງໄດ້ຂັບລົດຄັນດັ່ງກ່າວ ໄປຮັບເອົາຢາບ້ານຳທ້າວ ຂົນ ຈຳນວນ 27 ມັດ ຢູ່ເຂດທາງແບ່ງເຂົ້າບ້ານທ່າດິນແດງ.
ເມື່ອໄດ້ຢາບ້າມາແລ້ວ ນາງ ພັນ ຈຶ່ງກັບມາຫາທ້າວ ຊຽງຂາວ ແລະ ເຖົ້າແກ່ ທີ່ລໍຖ້າຢູ່ຕໍ່ໜ້າສະໜາມກີລາແຫ່ງຊາດ ຫຼັກ 16 ເມື່ອມາຮອດສະຖານທີ່ນັດໝາຍ ນາງ ພັນ ກໍ່ຫິ້ວຖົງຢາບ້າ ເພື່ອຈະໄປມອບໃຫ້ເຖົ້າແກ່ ແຕ່ເຈົ້າໜ້າທີ່ຕຳຫຼວດໄດ້ເຂົ້າມາກັກຕົວ ພ້ອມກັບຂອງກາງຢາບ້າ ຈຳນວນ 27 ມັດ ເທົ່າກັບ 54.000 ເມັດ ມາດຳເນີນຄະດີຕາມກົດໝາຍ.
ສ່ວນທ້າວ ຂົນ ຫຼື ກູດ ອາຍຸ 60 ປີ ຢູ່ບ້ານນາໝີ ເມືອງໄຊ ແຂວງອຸດົມໄຊ ຖືກກັກຕົວໃນເວລາຕໍ່ມາ ເຊິ່ງໃນໄລຍະກັກຕົວມາດຳເນີນຄະດີນັ້ນ ຜູ້ກ່ຽວມີອາການເຈັບເປັນ (ເປັນໂຣກຈິດ) ຕາມໃບສະຫຼຸບການປິ່ນປົວຂອງແພດໂຮງໝໍ 5 ເມສາ ສະບັບເລກທີ 525/ຮໝ ລົງວັນທີ 8 ກຸມພາ 2012 ແລະ ໃບຢັ້ງຢືນສຸຂະພາບຈິດຂອງໂຮງໝໍ 103 ສະບັບເລກທີ 69/ຮໝ 103 ລົງວັນທີ 13 ກຸມພາ 2012 ດັ່ງນັ້ນ ຫົວໜ້າໄອຍະການສານປະຊາຊົນ ນະຄອນຫຼວງວຽງຈັນ ຈຶ່ງອອກຄຳສັ່ງໂຈະການດຳເນີນຄະດີຕໍ່ຜູ້ກ່ຽວ.
