ເວລາປະມານ 14 ໂມງ 30 ນາທີຂອງວັນທີ 4 ມິຖຸນາ 2014 ທີ່ຜ່ານມາ ເຈົ້າໜ້າທີ່ພະແນກຕຳຫຼວດປ້ອງກັນເສດຖະກິດ ນະຄອນຫຼວງວຽງຈັນ ໄດ້ຮັບການລາຍງານຈາກພົນລະເມືອງດີວ່າ: ພົບເຫັນພຣະພຸດທະຮູບເກົ່າ ຢູ່ຄິວລົດເມຕະຫຼາດຂົວດິນ ນະຄອນຫຼວງວຽງຈັນ ດັ່ງນັ້ນ ທາງເຈົ້າໜ້າທີ່ຈຶ່ງໄດ້ລົງຕິດຕາມ ແລະ ກໍ່ໄດ້ພົບເຫັນພຣະພຸດທະຮູບຄ້າຍຄືທອງ ຈຳນວນ 6 ລາຍການຄື: ພຣະພຸດທະຮູບໃຫຍ່ ຈຳນວນ 7 ອົງ ພຣະພຸດທະຮູບຂະໜາດກາງ ຈຳນວນ 8 ອົງ ພຣະພຸດທະຮູບນັ່ງເຮືອ ຈຳນວນ 1 ອົງ ຫີນເຈັດສີ ຈຳນວນ 4 ອັນ ແລະ ໝໍ້ຫີນນ້ອຍ ຈຳນວນ 3 ອັນ ຈຶ່ງໄດ້ຢຶດໄວ້.
ຜ່ານການສອບຖາມຜູ້ເປັນເຈົ້າຂອງເຄື່ອງວັດຖຸບູຮານດັ່ງກ່າວ ຄື: ນາງ ໄມລໍ ອາຍຸ 30 ປີ ອາຊີບຄ້າຂາຍ ບ້ານນາຊູ ເມືອງວັງວຽງ ແຂວງວຽງຈັນ ຜູ້ກ່ຽວໄດ້ຮັບສາລະພາບວ່າ: ພຣະພຸດທະຮູບຈຳນວນ 7 ອົງ ຜູ້ກ່ຽວແມ່ນຈະເອົາໄປຖວາຍຢູ່ວັດບ້ານນາຊູ ເມືອງວັງວຽງ ແຂວງວຽງຈັນ ສ່ວນທີ່ເຫຼືອຜູ້ກ່ຽວອ້າງວ່າເປັນຂອງນາງ ນ້ອງ ອາຍຸ 32 ປີ ອາຊີບຄ້າຂາຍ ພັກເຊົາຢູ່ບ້ານໂພນສະຫວ່າງ ເມືອງຈັນທະບູລີ ນະຄອນຫຼວງວຽງຈັນ ດັ່ງນັ້ນ ໃນຕອນບ່າຍວັນທີ 5 ມິຖຸນາ 2014 ພະແນກຕຳຫຼວດປ້ອງກັນເສດຖະກິດ ຈຶ່ງໄດ້ມອບພຣະພຸດທະຮູບທັງໝົດທີ່ຢຶດມາໄດ້ນັ້ນ ມອບໃຫ້ແກ່ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ເປັນຜູ້ຄຸ້ມຄອງຮັກສາໄວ້ ເຊິ່ງກ່າວມອບໂດຍທ່ານ ພັທ ຄຳແພງ ໄຊຍະລາດ ຮອງຫົວໜ້າຫ້ອງຕຳຫຼວດ ແລະ ກ່າວຮັບໂດຍທ່ານ ໂຄຈອນ ແກ້ວມະນີວົງ ຮອງຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ມີພາກສ່ວນທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພິຍານ.
ພຣະພຸທຮູບດັ່ງກ່າວຄວນສະຖິດຢູ່ໃນວັດ, ບໍ່ແມ່ນຫວາ?
