ສົນທະນາທົ່ວໄປ

ອົດສະຕຣາລີ ສືບຕໍ່ໃຫ້ທຶນການສຶກສາ ແກ່ນັກສຶກສາມະຫາວິທະຍາໄລແຫ່ງຊາດ

(ຂປລ): ລັດຖະບານອົດສະຕຣາລີ ໄດ້ສືບຕໍ່ໃຫ້ທຶນການສຶກສາ ຈຳນວນ 70 ທຶນ ໃຫ້ແກ່ນັກສຶກສາມະຫາວິທະຍາໄລແຫ່ງຊາດ ໃນວັນທີ 19 ກຸມພາ 2013 ທີ່ນະຄອນຫລວງ ວຽງຈັນ ພາຍໃຕ້ໂຄງການທຶນການສຶກສາລາວ-ອົດສະຕຣາລີ ສຳລັບຮຽນພາຍໃນປະເທດ ໂດຍແມ່ນ ທ່ານ ບ໋ອບ ຄາ, ລັດຖະມົນຕີວ່າການກະຊວງການຕ່າງປະເທດອົດສະຕຣາ ລີ ເປັນຜູ້ມອບ, ມີທ່ານ ດຣ. ພັນຄຳ ວິພາວັນ, ລັດຖະມົນຕີວ່າການກະຊວງສຶກສາທິການ ແລະ ກິລາ, ບັນດາຄູ-ອາຈານຈາກມະຫາວິທະຍາໄລແຫ່ງຊາດ ແລະ ພາກສ່ວນກ່ຽວ ຂ້ອງສອງຝ່າຍເຂົ້າຮ່ວມເປັນສັກຂີພິຍານ.

ທ່ານລັດຖະມົນຕີວ່າການກະຊວງການຕ່າງປະເທດອົດສະຕຣາລີ ໄດ້ກ່າວວ່າ: ການສຶກສາເປັນກຸນແຈທີ່ສຳຄັນຕໍ່ການພັດທະນາເສດຖະກິດ-ສັງຄົມຂອງ ສປປ ລາວ ໃນອະນາຄົດ. ເປົ້າໝາຍຂອງໂຄງການທຶນ ການສຶກສາລາວ-ອົດສະຕຣາລີ ສຳລັບຮຽນພາຍໃນປະເທດ ແມ່ນເພື່ອສະໜັບສະໜູນໄວໜຸ່ມທັງຍິງ ແລະ ຊາຍ ທີ່ມາຈາກເຂດຫ່າງໄກສອກຫລີກ ແລະ ຕົວເມືອງທີ່ດ້ອຍໂອກາດດ້ານການສຶກສາໃນ ສປປ ລາວ ເພື່ອ ໃຫ້ເຂົາເຈົ້າໄດ້ສືບຕໍ່ຮ່ຳຮຽນໃນລະດັບປະລິນຍາຕີ ຢູ່ທີ່ມະຫາວິທະຍາໄລແຫ່ງຊາດໃນສາຂາຕ່າງໆ. ນອກ ຈາກນີ້ ໂຄງການດັ່ງກ່າວ ຍັງໄດ້ຮ່ວມມືກັບມະຫາວິທະຍາໄລແຫ່ງຊາດ ເພື່ອສ້າງທັກສະໃນການບໍລິຫານ ແລະ ຈັດການທຶນການສຶກສາ ແລະ ການໃຫ້ຄວາມຊ່ວຍເຫລືອແກ່ ນັກຮຽນ ເພື່ອສ້າງຜູ້ນຳຮຸ່ນຕໍ່ໆໄປບໍ່ວ່າຈະຢູ່ໃນອົງການຈັດຕັ້ງລັດ ຫລື ພາກເອກະຊົນ. ໃນໂອກາດດຽວກັນ, ທ່ານ ດຣ. ພັນຄຳ ວິພາວັນ, ໄດ້ກ່າວສະ ແດງຄວາມຂອບອົກຂອບ ໃຈມາຍັງ ທ່ານ ບ໋ອບ ຄາ ຜ່ານໄປຍັງລັດຖະບານ ກໍຄືປະຊາຊົນອົດສະຕຣາລີ ທີ່ໄດ້ ໃຫ້ການຊ່ວຍເຫລືອແກ່ ສປປ ລາວ ໃນຫລາຍຂົງເຂດ ເປັນຕົ້ນແມ່ນດ້ານການສຶກສາ, ການ ພັດທະນາຊົນນະບົດ ແລະ ອື່ນໆ ຊຶ່ງເປັນການປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ. ພ້ອມທັງສະແດງຄວາມຫວັງວ່າ ສປປ ລາວ ກໍຄືກະຊວງສຶກສາທິການ ແລະ ກິລາ ຈະສືບຕໍ່ໄດ້ຮັບການຊ່ວຍ ເຫລືອ ຈາກລັດຖະບານ ແລະ ປະຊາຊົນອົດສະຕຣາລີ ໃນຄັ້ງຕໍ່ໄປ.

ໂຄງການທຶນການສຶກສາລາວ-ອົດສະຕຣາລີ ສຳລັບຮຽນພາຍໃນປະເທດ ໄດ້ເລີ່ມຈັດຕັ້ງປະຕິບັດ ມາແຕ່ປີ 2012 ເພື່ອໃຫ້ທຶນການສຶກສາປີລະ 70 ທຶນ ເປັນທຶນສຶກສາຕະ ຫລອດໄລຍະການສຶກສາ 4 ປີ ໃນນັ້ນ ລວມມີ ຄ່າລົງທະບຽນ, ຄ່າຮຽນ, ຄ່າຫໍພັກ, ຄ່າເດີນທາງໄປຢາມບ້ານໃນເວລາພັກຮຽນ, ຄ່າປະກັນໄພອຸປະຕິເຫດ, ຄ່າປິ່ນປົວພ້ອມທັງ ມີການຈັດຕັ້ງການຮຽນພາສາອັງກິດ ອາທິດລະ 9 ຊົ່ວໂມງ.

ຂ່າວຍັງໃຫ້ຮູ້ອີກວ່າ: ໃນຕອນເຊົ້າວັນດຽວກັນ, ທ່ານ ບ໋ອບ ຄາ, ລັດຖະມົນຕີວ່າການກະຊວງການ ຕ່າງປະເທດອົດສະຕຣາລີ ພ້ອມດ້ວຍພັນລະຍາ ແລະ ຄະນະໄດ້ໄປຢ້ຽມຢາມ ໂຮງໝໍມະໂຫດສົດ ເພື່ອເບິ່ງການປະຕິບັດໜ້າທີ່ຂອງທີມງານແພດຈາກອົງການ ອິນເຕີພລັສ ອົດສະຕຣາລີ ແລະ ນິວຊີແລນ. ຈາກນັ້ນ ກໍໄດ້ເດີນທາງໄປຢ້ຽຢາມ ແລະ ພົບປະ ກັບທ່ານ ຄຳແພງ ໄຊສົມແພງ, ເຈົ້າແຂວງຫລວງພະບາງ./.