ຜົນການສືບສວນ-ສອບສວນ ຄັ້ງທີ II ຂອງເຈົ້າໜ້າທີ່ຕຳຫລວດ ກ່ຽວກັບການຊອກຕົວ ທ້າວສົມບັດ ສົມພອນ
*(ຂປລ): ເພື່ອເປັນການຮັບຮູ້ ແລະ ເຂົ້າໃຈເພີ່ມຕື່ມ ກ່ຽວກັບການເຄື່ອນໄຫວເຮັດວຽກງານ ສືບສວນ-ສອບສວນ ຂອງເຈົ້າໜ້າທີ່ຕຳຫລວດ ທີ່ໄດ້ຮັບມອບໝາຍຈາກການ ຈັດຕັ້ງຂັ້ນເທິງກ່ຽວກັບການຊອກຫາຕົວ ທ້າວ ສົມບັດ ສົມພອນ ຜ່ານມາ. ຂ້າພະເຈົ້າ ພັນເອກ ດຣ. ເພັງສະຫວັນ ທິບພະວົງໄຊ, ຮອງຫົວໜ້າກົມໃຫຍ່ຕຳຫລວດ, ກະຊວງປ້ອງ ກັນຄວາມສະຫງົບ ຕາງໜ້າໃຫ້ຄະນະຮັບຜິດຊອບດຳເນີນຄະດີ ຂໍແຈ້ງຜົນການສືບສວນ-ສອບສວນ ຊອກຫາຕົວ ທ້າວ ສົມບັດ ສົມພອນ ຕື່ມເປັນຄັ້ງທີ II ໃນວັນທີ 1 ມີນາ 2013 ໂດຍມີລາຍລະອຽດດັ່ງນີ້.
ຫລັງຈາກທີ່ຂ້າພະເຈົ້າ ໄດ້ແຈ້ງຜົນການສືບສວນ-ສອບສວນ ຊອກຫາຕົວ ທ້າວ ສົມບັດ ສົມພອນ ເບື້ອງຕົ້ນໃນຄັ້ງວັນທີ 11/1/2013 ຕໍ່ມາພວກຂ້າພະເຈົ້າ ກໍຍັງໄດ້ເອົາໃຈໃສ່ສືບ ຕໍ່ດຳເນີນການສືບສວນ-ສອບສວນ, ເກັບກຳແຫລ່ງຂ່າວຂໍ້ມູນຕ່າງໆນຳບຸກຄົນ ແລະ ພາກສ່ວນທີ່ກ່ຽວຂ້ອງຕາມພາລະບົດບາດໜ້າທີ່ຂອງອົງການສືບສວນ-ສອບສວນ ຂອງເຈົ້າ ໜ້າທີ່ຕຳຫລວດເຊິ່ງສະແດງອອກຄື: ໃນວັນທີ 15-16/1/2013 ໄດ້ສືບຕໍ່ເຊີນນາງ ອຶງ ຊຸຍມິງ (ພັນລະຍາ), ນາງ ເພັດສະໄໝ (ນ້ອງສາວ) ແລະ ນາງ ສົມຈິດ (ຫລານສາວ) ຂອງ ທ້າວ ສົມບັດ ສົມພອນ ເພື່ອສືບຕໍ່ປຶກສາເກັບກຳຂໍ້ມູນກ່ຽວກັບທ້າວ ສົມບັດ ສົມພອນ ເພື່ອເປັນບ່ອນອີງໃນການສືບຕໍ່ຊອກຕົວຜູ້ກ່ຽວຈຶ່ງຮູ້ໄດ້ວ່າ: ຜູ້ກ່ຽວມີຍາດໃກ້ຊິດ ຢູ່ແຂວງ ຄຳມ່ວນ. ດັ່ງນັ້ນ ໃນວັນທີ 24-25/1/2013 ຈຶ່ງໄດ້ລົງໄປປະສານສົມທົບກັບກອງບັນຊາການ ປກສ ແຂວງຄຳມ່ວນ ເພື່ອພ້ອມກັນໄປເກັບກຳຂໍ້ມູນນຳນ້ອງຊາຍສອງຄົນ ແລະ ນ້ອງສາວສອງຄົນ ຂອງທ້າວ ສົມບັດ ສົມພອນ ຢູ່ບ້ານໜອງບົວຄຳ ແລະ ບ້ານສັນຕິສຸກ ເມືອງທ່າແຂກ ແຂວງຄຳມ່ວນ ກໍສາມາດຮູ້ໄດ້ຂໍ້ມູນເພີ່ມຕື່ມຈຳນວນໜຶ່ງ ແລະ ວັນທີ 8/2/2013 ຈຶ່ງໄດ້ເຊີນເອົານາງ ອຶງ ຊຸຍມິງ (ພັນລະຍາ) ແລະ ນາງ ເພັດສະໄໝ (ນ້ອງສາວ) ເພື່ອມາພ້ອມກັນຕີລາຄາ ປຶກສາທິດທາງສືບຕໍ່ໃນການຊອກຕົວ ຂອງທ້າວ ສົມບັດ ສົມພອນ ພ້ອມທັງແຈ້ງຜົນການສືບສວນ-ສອບສວນ ໃນໄລຍະຜ່ານມາໃຫ້ພວກກ່ຽວຊາບ. ທາງດ້ານວິຊາສະເພາະ ກໍໄດ້ສືບຕໍ່ປະສານສົມທົບ ແລະ ມອບໝາຍໃຫ້ ທຸກເຫລົ່າລົບວິຊາສະເພາະຂອງເຈົ້າໜ້າທີ່ຕຳຫລວດທົ່ວປະເທດ ໃນການຕິດຕາມຊອກຫາແຫລ່ງຂ່າວ, ຂໍ້ມູນ ເພື່ອນຳຫາຜູ້ກ່ຽວຕະຫລອດມາ.
ຕໍ່ກັບຄຳສະເໜີຂອງນາງ ອຶງ ຊຸຍມິງ ພັນລະຍາຂອງທ້າວ ສົມບັດ ສົມພອນ ແລະ ຄຳສົນໃຈຂອງບາງປະເທດ, ສະມາຊິກລັດຖະສະພາບາງປະເທດ, ລັດຖະສະພາເອີລົບ, ບາງອົງ ການຈັດຕັ້ງສາກົນ, ບາງອົງການຈັດຕັ້ງບໍ່ສັງກັດລັດຖະບານ, ບາງສື່ມວນຊົນຕ່າງປະເທດ ແລະ ບຸກຄົນ ກ່ຽວກັບບາງບັນຫາດັ່ງນີ້: ເຈົ້າໜ້າທີ່ສືບສວນໄດ້ສອບຖາມຫຍັງແດ່ ຕໍ່ກັບ ຕຳຫລວດທີ່ໄດ້ຢຸດລົດຂອງສາມີຂ້າພະເຈົ້າ (ທ້າວ ສົມບັດ ສົມພອນ) ໃນຕອນແລງວັນທີ 15 ທັນວາ 2012? ເຈົ້າໜ້າທີ່ໄດ້ຖາມບໍ່ວ່າເກີດຫຍັງຂຶ້ນໃນມື້ນັ້ນ ແລະ ພວກເຂົາໄດ້ເຫັນ ແລະ ຮູ້ຫຍັງແດ່? ຕໍ່ກັບຄຳຖາມດັ່ງກ່າວ, ຂ້າພະເຈົ້າເຄີຍຊີ້ແຈງແລ້ວວ່າພວກເຮົາໄດ້ສອບຖາມເຈົ້າໜ້າທີ່ຕຳຫລວດຈະລາຈອນ ທີ່ປະຕິບັດໜ້າທີ່ຢູ່ຈຸດດັ່ງກ່າວ ໃນມື້ນັ້ນ ພວກເຂົາໄດ້ຕອບວ່າ: ທຸກໆວັນແມ່ນໄດ້ມີການກວດລົດຈຳນວນຫລາຍຄັນ ຕາມລະບຽບການເປັນປົກກະຕິ, ບໍ່ສາມາດຈື່ໄດ້ວ່າໄດ້ກວດລົດຊະນິດໃດແດ່, ລົດຂອງໃຜ, ບຸກຄົນໃດ, ເພາະເຈົ້າໜ້າທີ່ຕຳຫລວດຈະລາຈອນເຮົາກວດກາເບິ່ງແຕ່ເອກະສານລົດ, ທະບຽນລົດຖ້າຄົບຖ້ວນ ແລະ ຖືກຕ້ອງກໍສົ່ງເອກະສານຄືນແລ້ວປ່ອຍເຂົາເຈົ້າໄປຕາມລະບຽບ ການໃນມື້ນັ້ນສະພາບແມ່ນປົກກະຕິບໍ່ມີເຫດການຈັບກຸມທຸບຕີກັນຢ່າງໃດ ແລະ ບໍ່ໄດ້ກັກລົດປະເພດໃດ ຫລື ກັກບຸກຄົນໃດ. ບໍ່ຮູ້ວ່າຄົນຂີ່ລົດຈັກທີ່ໄດ້ຂັບລົດຈິບຂອງ ສົມບັດ ໄປນັ້ນໄດ້ຖືກສືບຖາມ ແລະ ຂະຫຍາຍຜົນແນວໃດ?. ພວກເຮົາໄດ້ພະຍາຍາມກວດເບິ່ງຈາກກ້ອງວົງຈອນປິດຫລາຍຄັ້ງ ກໍເຫັນໄດ້ຊ່ຳທີ່ໄດ້ບັນທຶກພາບໄວ້ເທົ່ານັ້ນ ເພາະເປັນ ເລື່ອງເຕັກນິກ, ທັງເປັນກາງຄືນບໍ່ສາມາດເຫັນໄດ້ຢ່າງຊັດເຈນວ່າ ແມ່ນຜູ້ໃດຂັບຂີ່ລົດຈັກມາ, ເລກທະບຽນລົດຈັກເທົ່າໃດກໍບໍ່ເຫັນ, ຜ່ານການຖາມເຈົ້າໜ້າທີ່ຈະລາຈອນບອກວ່າ ບໍ່ໄດ້ຕິດຕາມເບິ່ງລົດຈັກ ຫລື ລົດຈິບໃຜເປັນຜູ້ຂັບລົດຈັກມາ ແລະ ຂັບລົດຈິບອອກໄປ ເພາະວ່າສະພາບປົກກະຕິ, ມີແຕ່ກ່ອນຈະໄປກິນເຂົ້າແລງເຈົ້າໜ້າທີ່ຕຳຫລວດຈະລາຈອນ ໄດ້ເຫັນລົດຈັກຄັນໜຶ່ງຈອດກີດຂວາງທາງຍ່າງ ຈຶ່ງຍ່າງໄປເພື່ອຢາກຍ້າຍລົດຈັກອອກຈາກທາງຍ່າງ, ແຕ່ລົດຈັກຖືກໃສ່ກຸນແຈຄໍໄວ້ ຈຶ່ງບໍ່ສາມາດຍ້າຍໄດ້ ແລະ ເຂົ້າໃຈວ່າມີ ເຈົ້າຂອງລົດຈັກຄັນດັ່ງກ່າວຢູ່ໃກ້ໆແຖວນັ້ນ ເຈົ້າໜ້າທີ່ຕຳຫລວດຈະລາຈອນຈຶ່ງກັບຄືນ ແລະ ໄປກິນເຂົ້າ. ຕໍ່ກັບຜູ້ຂັບຂີ່ລົດຈັກ ແລະ ຜູ້ຂັບຂີ່ລົດຈິບອອກໄປ ເຈົ້າໜ້າທີ່ກໍຍິ່ງມີ ຄວາມຕ້ອງການຊອກຫາພວກກ່ຽວທີ່ສຸດ ຖ້າຜູ້ໃດຮູ້ເຫັນຊ່ວຍແຈ້ງໃຫ້ເຈົ້າໜ້າທີ່ຕຳຫລວດບ່ອນທີ່ໃກ້ສຸດ.
ລົດຈິບຂອງ ທ້າວ ສົມບັດ ສົມພອນ ທະບຽນ ກກ 2624 ພົບເຫັນ ຫື ຍັງ?. ເຈົ້າໜ້າທີ່ພວກເຮົາໄດ້ພະຍາຍາມຊອກຕົວທ້າວ ສົມບັດ ສົມພອນ ພ້ອມທັງລົດເລກທະບຽນ ກກ 2624 ນັບແຕ່ມື້ໄດ້ຮັບແຈ້ງຄວາມ ໂດຍພວກເຮົາໄດ້ແຈ້ງການເຖິງບັນດາກອງບັນຊາການ ປກສ ແຂວງ, ເມືອງໃນທົ່ວປະເທດ ແລະ ໄດ້ຈັດຕັ້ງພະນັກງານອອກເຄື່ອນໄຫວ ກຳສະພາບ, ກຳຂໍ້ມູນຊອກຫາຕົວ, ຊອກຫາລົດທ້າວ ສົມບັດ ສົມພອນ (ຊຶ່ງຂ້າພະເຈົ້າໄດ້ຊີ້ແຈງຢູ່ຂ້າງເທິງນັ້ນແລ້ວ) ແຕ່ມາຮອດປະຈຸບັນຍັງບໍ່ທັນມີບຸກຄົນໃດ ແລະ ພາກສ່ວນ ໃດແຈ້ງຂໍ້ມູນກ່ຽວກັບຕົວ ທ້າວ ສົມບັດ ສົມພອນ ແລະ ລົດຈິບຄັນດັ່ງກ່າວ ໃຫ້ພວກເຮົາເທື່ອ.
ຮູ້ບໍ່ວ່າ ລົດກະບະສີຂາວ ທີ່ຂັບມາຈອດຢູ່ປ້ອມຕຳຫລວດ ແລະ ຮັບເອົາສາມີ (ທ້າວ ສົມບັດ ສົມພອນ) ນັ້ນໄດ້ຖືກຂະຫຍາຍຜົນຕື່ມແນວໃດ?. ຕໍ່ບັນຫາດັ່ງກ່າວຜ່ານການເບິ່ງ ຈາກກ້ອງວົງຈອນປິດຫລາຍຄັ້ງ ພວກເຮົາເຫັນໄດ້ພຽງເປັນລົດກະບະ ບໍ່ເຫັນປ້າຍທະບຽນລົດຊັດເຈນ, ຜູ້ທີ່ຂຶ້ນ ແລະ ຜູ້ຂັບລົດຍິ່ງບໍ່ເຫັນ ເຈົ້າໜ້າທີ່ພວກເຮົາກໍມີຄວາມເອົາໃຈ ໃສ່ລົງກວດກາສອບຖາມເຈົ້າໜ້າທີ່ຕຳຫລວດຈະລາຈອນ ທີ່ປະຕິບັດໜ້າທີ່ຢູ່ຈຸດດັ່ງກ່າວໃນມື້ນັ້ນ ແລະ ປະຊາຊົນຢູ່ຂົງເຂດນັ້ນບໍ່ເຫັນມີການຕໍ່ສູ້ ແລະ ຍິນສຽງຮ້ອງຂໍຄວາມ ຊ່ວຍເຫລືອຂອງບຸກຄົນໃດໜຶ່ງຈາກລົດຄັນໃດ. ເຖິງຢ່າງໃດກໍຕາມພວກເຮົາສືບຕໍ່ຕິດຕາມ, ເກັບກຳຂໍ້ມູນ ເພື່ອເປັນບ່ອນອີງໃນການຊອກລົດ ແລະ ຜູ້ຂັບລົດຄັນດັ່ງກ່າວ.
ຖ້າຫາກວ່າແຟ້ມພາບຈາກກ້ອງວົງຈອນປິດຫາກເຫັນບໍ່ຊັດເຈນ ຕາມການລາຍງານຂອງເຈົ້າໜ້າທີ່ບໍ່ຮູ້ວ່າທາງກະຊວງປ້ອງກັນຄວາມສະຫງົບ ໄດ້ຂໍຄວາມຊ່ວຍເຫລືອດ້ານເຕັກນິກ ຈາກລັດຖະບານອື່ນ ຫລື ອົງການສາກົນຫລືບໍ່? ແລ້ວກ້ອງວົງຈອດປິດທີ່ຕັ້ງຕາມສາຍທາງທ່າເດື່ອ ກໍເຫັນບໍ່ຊັດເຈນເຊັ່ນດຽວກັນທັງໝົດບໍ່?. ກ່ຽວກັບກ້ອງວົງຈອນປິດເປັນພື້ນ ຖານທາງດ້ານເຕັກນິກວິຊາສະເພາະຂອງເຈົ້າໜ້າທີ່ຕຳຫລວດ ຕາມຫລັກການແລ້ວບໍ່ວ່າຢູ່ປະເທດໃດຈະບໍ່ອະນຸຍາດໃຫ້ບຸກຄົນອື່ນ ທີ່ບໍ່ມີຄວາມຮັບຜິດຊອບເຂົ້າໄປສະຖານທີ່ ດັ່ງກ່າວໄດ້ຢ່າງເດັດຂາດ ແຕ່ເຈົ້າໜ້າທີ່ຕຳຫລວດຂອງ ສປປ ລາວ ເຫັນຄວາມສຳຄັນ ແລະ ມີຄວາມຈິງໃຈຊ່ວຍເຫລືອ ຈຶ່ງອະນຸຍາດໃຫ້ນາງ ອຶງ ຊຸຍມິງ ພັນລະຍາ ແລະ ຫລານສາວ ຂອງທ້າວ ສົມບັດ ສົມພອນ ເຂົ້າໄປສູນບັນຊາກ້ອງວົງຈອນປິດ ຂອງເຈົ້າໜ້າທີ່ຕຳຫລວດນະຄອນຫລວງວຽງຈັນ ເພື່ອກວດກາບັນທຶກເອົາພາບຈາກກ້ອງວົງຈອນປິດທັງໝົດ ທີ່ມີແລ້ວສົ່ງໃຫ້ທຸກໆອົງການທັງລົງອິນເຕີເນັດ. ພາບທີ່ບັນທຶກໄດ້ກໍມີພຽງແຕ່ເທົ່ານັ້ນ ແລະ ຄວາມຊັດເຈນຊ່ຳໃດໃຜເບິ່ງກໍ່ເຫັນຊ່ຳນັ້ນ ຍ້ອນເລື່ອງເຕັກນິກ ເພາະເປັນພາບບັນ ທຶກ (ບໍ່ແມ່ນພາບເຫດການສົດໆ) ຈຶ່ງບໍ່ສາມາດຫຍໍ້ເຂົ້າ ຫລື ຂະຫຍາຍພາບອອກ (ຊຸມເຂົ້າ-ອອກ) ໄດ້ເພື່ອເບິ່ງຢ່າງຊັດເຈນ, ສ່ວນລາຍລະອຽດແນວໃດ ເຈົ້າໜ້າທີ່ຕຳຫລວດ ພວກເຮົາຍັງຈະສືບຕໍ່ການກວດກາຕື່ມ. ນອກຈາກນັ້ນ ພວກເຮົາກໍໄດ້ໄປກວດກາຢູ່ສູນບັນຊາກ້ອງວົງຈອນປິດ ຂອງເຈົ້າໜ້າທີ່ຕຳຫລວດຈະລາຈອນນະຄອນຫລວງຄືນກໍເຫັນພຽງ ແຕ່ພາບຄືກັນກັບນາງ ອຶງ ຊຸຍມິງ ໄດ້ບັນທຶກພາບເອົາໄວ້ເທົ່ານັ້ນ, ສ່ວນຈຸດອື່ນໆກວດກາແລ້ວແມ່ນບໍ່ພົບເຫັນ. ສະນັ້ນ ບັນຫາດັ່ງກ່າວເຈົ້າໜ້າທີ່ຕຳຫລວດພວກເຮົາສາມາດດຳ ເນີນການກວດກາໄດ້ ແລະ ເປັນຄວາມຮັບຜິດຊອບພາຍໃນຂອງພວກເຮົາ ຈຶ່ງບໍ່ມີຄວາມຈຳເປັນຂໍການຊ່ວຍເຫລືອຈາກພາຍນອກ, ອີກດ້ານໜຶ່ງເປັນວຽກງານທີ່ກ່ຽວຂ້ອງກັບ ຄວາມປອດໄພ ແລະ ຄວາມໝັ້ນຄົງ, ແຕ່ລະປະເທດກໍມີລະບຽບຫລັກການພາຍໃນຂອງໃຜມັນ.
ບໍ່ຮູ້ວ່າເຈົ້າໜ້າທີ່ຕຳຫລວດລາວ ໄດ້ຍົກປະເດັນນີ້ແຈ້ງ ແລະ ຂໍຄວາມຊ່ວຍເຫລືອຈາກຕຳຫລວດສາກົນຫລືບໍ່ ? ແລະ ໄດ້ແຈ້ງໃຫ້ບັນດາປະເທດເພື່ອນບ້ານໃນພາກພື້ນຮັບຮູ້ ແລະ ຊອກຫາທ້າວ ສົມບັດ ສົມພອນ ຫລື ບໍ່?. ເຈົ້າໜ້າທີ່ຕຳຫລວດລາວ ໄດ້ແຈ້ງຫາຕຳຫລວດຂອງປະເທດອາຊຽນ ແລະ ຕຳຫລວດສາກົນ ເພື່ອຊ່ວຍຕິດຕາມ ທ້າວ ສົມບັດ ສົມພອນ ແລະ ລົດຜູ້ກ່ຽວ. ເຫດການດັ່ງກ່າວນີ້ ແມ່ນເກີດຂຶ້ນຢູ່ພາຍໃນຂອງ ສປປ ລາວ ເຖິງວ່າເຫດການລັກສະນະນີ້ ບໍ່ຄ່ອຍເກີດຂຶ້ນຢູ່ ສປປ ລາວ ຄືຢູ່ກັບຫຼາຍປະເທດ ແຕ່ຜ່ານມາເຫດການນີ້ກໍ່ເຄີຍເກີດຂຶ້ນຕົວຢ່າງ: ໃນປີ 1988 ມີການລັກພາຕົວເຈົ້າໜ້າທີ່ສະຖານທູດຍີ່ປຸ່ນ ຊອກໄປຊອກມາຫຼາຍປີຈິ່ງພົບເຫັນຜູ້ກ່ຽວຢູ່ປະເທດໄທ. ກ່ອນໜ້ານີ້ 5 ປີ ມີເອື້ອຍຂອງພັນລະຍາທ່ານ ປຣະສິດ ໄຊຍະສິດ, ຫົວໜ້າກົມພິທີການທູດ, ກະຊວງການຕ່າງປະເທດ ແຫ່ງ ສປປ ລາວ ກໍໄດ້ຫາຍຕົວໄປຈົນເຖິງປະຈຸບັນ ກໍຍັງບໍ່ມີຂ່າວຄາວຫຍັງ, ປີ 2010 ມີເຈົ້າໜ້າທີ່ຕຳຫຼວດຢູ່ກອງບັນຊາການ ປກສ ເມືອງປາກກະດິງ ຊື່ທ້າວ ສາຄອນ ໄດ້ຫາຍຕົວ, ມາເຖິງປະຈຸບັນກໍ່ຍັງບໍ່ພົບເຫັນ, ໃນກາງປີ 2012 ກໍມີເຈົ້າໜ້າທີ່ຕຳຫຼວດ ຢູ່ກອງບັນຊາການ ປກສ ແຂວງຫຼວງນ້ຳທາ ຊື່ທ້າວ ບຸນລັດ ກໍຫາຍຕົວມາຮອດປະຈຸບັນກໍ່ຍັງບໍ່ພົບເຫັນ.
ກໍລະນີແບບນີ້ກໍເກີດຂຶ້ນຢູ່ຫຼາຍປະເທດ ແລະ ບໍ່ສາມາດເວົ້າໄດ້ວ່າ ເຈົ້າໜ້າທີ່ພວກເຮົາຈະໃຊ້ເວລາສືບສວນ-ສອບສວນ ສຳເລັດໄດ້ໄວ ຫຼື ຍາກງ່າຍແນວໃດ ເນື່ອງຈາກວ່າກໍລະນີ ດັ່ງກ່າວມີຄວາມສັບສົນ. ໃນກໍລະນີນີ້ ພວກທີ່ເປັນພົນລະເມືອງລາວດ້ວຍກັນ ກໍຍິ່ງມີຄວາມເສຍໃຈ ແລະ ເຫັນໃຈນຳຄອບຄົວ, ຍາດຕິພີ່ນ້ອງຂອງຜູ້ກ່ຽວ, ໃຜໆກໍ່ຢາກໃຫ້ ຜູ້ກ່ຽວກັບມາຫາຄອບຄົວໄດ້ຢ່າງປອດໄພ ແລະ ຄອບໃຈນຳທຸກຄົນ, ອົງການຈັດຕັ້ງສາກົນຫຼາຍປະເທດທີ່ເປັນຫ່ວງແຕ່ຖາມວ່າມື້ໃດຈະດຳເນີນສຳເລັດ? ບໍ່ມີໃຜຕອບໄດ້, ເຈົ້າ ໜ້າທີ່ພວກເຮົາຍັງດຳເນີນການສືບສວນ-ສອບສວນຢູ່.
ສະນັ້ນ, ຕໍ່ເຫດການດັ່ງກ່າວຂ້າງເທິງນັ້ນ ພວກເຮົາກໍ່ໄດ້ມີການແຈ້ງຜ່ານໂທລະພາບ, ໜັງສືພີມ ແລະ ໄດ້ແຈ້ງໃຫ້ເຈົ້າໜ້າທີ່ຕຳຫຼວດແຂວງ, ເມືອງໃນທົ່ວປະເທດ, ແຈ້ງໃຫ້ຕຳ ຫຼວດສາກົນ ແລະ ຕຳຫຼວດອາຊຽນ ເພື່ອຊ່ວຍຊອກຫາຂໍ້ມູນແຕ່ກໍຍັງບໍ່ທັນມີຂໍ້ມູນຫຼັກຖານຮັດກຸມເພື່ອຊອກຫາຕົວ ທ້າວ ສົມບັດ ສົມພອນ ໄດ້ເທື່ອຊຶ່ງຄະນະນຳກະຊວງປ້ອງ ກັນຄວາມສະຫງົບ ກໍຄືກົມໃຫ່ຍຕຳຫຼວດ ໄດ້ເອົາໃຈໃສ່ຊີ້ນຳຢ່າງເປັນປົກກະຕິ ຕໍ່ຄະນະຮັບຜິດຊອບດຳເນີນຄະດີ, ຄະນະຮັບຜິດຊອບດຳເນີນຄະດີກໍໄດ້ມີຄວາມຮັບຜິດຊອບສູງ ແລະ ບໍ່ໄດ້ລົດລະຄວາມພະຍາຍາມໃນການສືບສວນ-ສອບສວນ ເພື່ອຊອກຮູ້ວ່າເຫດການຕົວຈິງເກີດຂຶ້ນແນວໃດແທ້, ກົງກັນຂ້າມຜ່ານມາຍັງມີບາງບຸກຄົນ, ບາງອົງການຈັດຕັ້ງ ບໍ່ສັງກັດລັດຖະບານ, ບາງສື່ມວນຊົນຕ່າງປະເທດໄດ້ຕີລາຄາຕໍ່ເຫດການດັ່ງກ່າວແບບບໍ່ສ້າງສັນ, ປັ່ນປ່ວນພາຍໃນສັງຄົມ, ໃສ່ຮ້າຍປ້າຍສີວ່າເຈົ້າໜ້າທີ່ຕຳຫລວດ ເປັນຜູ້ກັກຕົວ ທ້າວ ສົມບັດ ສົມພອນ ແມ່ນບໍ່ຖືກກັບຄວາມຈິງ, ຄືກັບເຫດການເກີດຂຶ້ນໃນປີ 2010 ມີບຸກຄົນ ແລະ ອົງການຈັດຕັ້ງຕ່າງໆລວມທັງສື່ມວນຊົນຢູ່ຕ່າງປະເທດ ໃສ່ຮ້າຍປ້າຍສີວ່າ ເຈົ້າໜ້າທີ່ຕຳຫຼວດຢູ່ຄ້າຍຄຸມຂັງ ໂພນຕ້ອງ ເປັນຜູ້ຂົ່ມຂືນທຳສຳເລົາ ນາງ ສຸມັດຕາ ຈົນຖືພາ ຄົນ ສັນຊາດ ອັງກິດ ເປັນຜູ້ຕ້ອງຫາຄ້າຂາຍຢາເສບຕິດ ປະເພດ ເຮໂຣອິນ ແຕ່ສຸດທ້າຍ ແມ່ນເລ້ລ່ຽມກົນອຸບາຍ ຂອງຜູ້ກ່ຽວເອງໂດຍນຳເອົານ້ຳອະສຸຈິ ຈາກ ທ້າວ ຈອນ ວັດສັນ ສັນຊາດ ອັງກິດ ເປັນຜູ້ຕ້ອງຫາທີ່ຖຶກກັກຂັງ ຢູ່ຄ້າຍຄຸມຂັງ ໂພນຕ້ອງ ດ້ວຍກັນມາສີດເຂົ້າອະໄວຍະວະເພດຂອງຕົນເອງ ຈິ່ງເຮັດໃຫ້ຖືພາເພື່ອໃຫ້ຫລຸດພົ້ນຈາກໂທດປະຫານຊີວິດ.
ຊີ້ແຈ້ງໄດ້ດີແບບນີ້ຕ້ອງໄດ້ເລື່ອນຊັ້ນຂຶ້ນເປັນພົນຈັດຕະວາໃນໄວໆນີ້ແນ່ນອນ
ຂໍສະແດງຄວາມຍິນດີລ່ວງໜ້າເດີທ່ານ ພັນເອກ ດຣ. ເພັງສະຫວັນ ທິບພະວົງໄຊ.
