ຮຸນໄດເຈີດຕົກຂົວຫງາຍ ທ້ອງຫລັງຕຳລົດຈັກ 2 ຄັນ
ຂ່າວ: ຄຳພັນ
ອຸບັດເຫດເກີດຂຶ້ນອີກເມື່ອເວລາປະມານ 17:00 ໂມງຂອງວັນທີ 10 ມີນາ 2013 ທີ່ຂົວນາແຝງໃກ້ກັບແຍກເບີ 5 ໂພນສະຫວັນ ແຂວງຊຽງຂວາງ. ຕາມຜູ້ເຫັນເຫດການເລົ່າວ່າ ມີລົດຮຸນໄດແລ່ນອອກຈາກຮ້ານສ້ອມແປງລົດທາງເບີ 5 ມຸ່ງຫນ້າໄປທາງນ້ຳຫງຳປະມານ 20 ກວ່າແມັດ ກໍ່ໄປເກາະເອົາລົດຈັກທີ່ຂັບຂີ່ໂດຍ ນາງເຍັຍ ວາງ ແລະ ນາງ ໄມລີ ຊ້ອນທ້າຍລົ້ມໄປທາງເບື້ອງຂວາມືບາດເຈັບເລັກ ນ້ອຍ, ແຕ່ລົດຮຸນໄດພຸ່ງໄປທາງຫນ້າອີກໄປຕຳເອົາລົດຈັກທີ່ຂັບຂີ່ໂດຍ ທ້າວ ເຟືອງ ແລະ ຊ້ອນທ້າຍໂດຍ ທ້າວ ລິງ ທັງສອງແມ່ນກຳມະກອນຊາວຫວຽດນາມຢູ່ໂຮງເລື່ອຍບ້ານລີ່ ເຮັດໃຫ້ທັງສອງບາດເຈັບສາຫັດ ແລະ ໄດ້ສົ່ງໄປປົວຢູ່ຫວຽດນາມຫລັງເກີດເຫດແລ້ວ.
ສ່ວນລົດຮຸນໄດເປັນລົດຂອງປະຊາຊົນບ້ານໂພນງາມໃຕ້ ເອົາໄປໃຫ້ຮ້ານສ້ອມແປງຂອງຄົນຫວຽດນາມມາຕັ້ງຢູ່ບ້ານໂພນງາມນັ້ນ, ລົດໄດ້ພຽງແຕ່ໂປ້ສີທາງຫນ້າກຳມະກອນຫວຽດກໍ່ເອົາລົດຂັບອອກໄປຫລິ້ນກໍ່ເລີຍເກີດເຫດດັ່ງກ່າວຂຶ້ນ, ຫລັງຈາກຕຳລົດຈັກຄັນທີ 2 ແລ້ວລົດໄດ້ເສຍຫລັກຕົກລົງຂົວນາແຝງຫົວປັກລົງໃສ່ນ້ຳຫງາຍທ້ອງຂຶ້ນຟ້າ ດີແຕ່ວ່າຍາມນີ້ນ້ຳບໍ່ຫລາຍ ແຕ່ຜູ້ຂັບ ແລະ ຫມູ່ກໍ່ບໍ່ສາມາດອອກຈາກລົດທາງປະຕູໄດ້ທັງສອງຄົນທີ່ຢູ່ໃນລົດຮຸນໄດໄດ້ທັບແກ້ວເບື້ອງຫລັງອອກໄປ, ດີແຕ່ເຈົ້າຫນ້າທີ່ມາເຖິງໄວ ແລະ ໄດ້ຮັກສາຕົວ ເພື່ອສືບສວນສອບສວນ.
ເຈົ້າຫນ້າທີ່ຈະລາຈອນແຂວງໃຫ້ຮູ້ວ່າ: ທ້າວ ຫງຽນວັນກຽດ ອາຍຸ 20 ປີ ສັນຊາດຫວຽດນາມເປັນກຳມະກອນອູ່ສ້ອມແປງລົດແຫ່ງນີ້ເປັນຜູ້ຂັບຂີ່. ເຫດເກີດຂຶ້ນຄັ້ງນີ້ ໄດ້ເຮັດໃຫ້ມີຜູ້ບາດ ເຈັບສາຫັດ 2 ຄົນ, ບາດເຈັບເລັກນ້ອຍ 4 ຄົນ ພາຫະນະເປ່ເພສົມຄວນ ແລະ ຮາວກັນຂ້າງຂົວຖືກເສຍຫາຍ. ສ່ວນລາຍລະອຽດຂອງການເກີດອຸບັດເຫດ, ການດຳເນີນຄະດີ ແລະ ປະເມີນຄ່າເສຍຫາຍເຈົ້າຫນ້າທີ່ຍັງກຳລັງສືບຕໍ່ດຳເນີນຕໍ່ໄປ.
ໃນຄ່ຳຄືນຂອງມື້ດຽວກັນ ທີ່ແຂວງຊຽງຂວາງກໍ່ຍັງມີອຸບັດເຫດລົດບຸເຂົ້າເຮືອນຂອງປະຊາຊົນບ້ານໂພນສະຫວັນໄຊ ເມືອງແປກອີກ ແຕ່ບໍ່ທັນໄດ້ລາຍລະອຽດກ່ຽວກັບເລື່ອງນີ້.
ການເກີດອຸບັດເຫດຕາມທ້ອງຖະຫນົນຢູ່ແຂວງຊຽງຂວາງແມ່ນເກີດຂຶ້ນຕະຫລອດມາ ໂດຍສະເພາະບ່ອນທີ່ມີຄວາມແອອັດ ແຕ່ຜັດບໍ່ມີຫລັກຖານດ້ານເຄື່ອງມືທັນສະໄຫມມາຊ່ວຍເຊັ່ນ: ກ້ອງວົງຈອນປິດ ເຮັດໃຫ້ການດຳເນີນຄະດີຫຍຸ້ງຍາກດ້ານຫລັກຖານ.
ມັນບໍ່ແອອັດດອກທາງການລາວອະນຸຍາດໄຫ້ອ້າຍຫວຽດເຂົ້າມາຍາດວຽກເຮັດງານຂອງລາວເຮົາສະນັ້ນພວກຫວຽດ
ບໍ່ສາມາດອ່ານກົດລະບຽບພາສາລາວບໍ່ໄດ້ຈື່່ງເກີດອຸບັດຕິເຫດ ອົດເອົາເດີ ຫວຽດນາມແມ່ນເປັນອ້າຍນ້ອງເຈົ້າຫັນລະ ນັບ
ມື້ນັບມັນຂົນກັນເຂົ້າມາຢູ່ດີນລາວ ອິກບໍ່ດົນມັນຈະບໍ່ມີລາວອີກແລ້ວ
ວັນທີ 13/03/2013 - ເວລາ 10:08:39 
