listen>>
ອົງການ NGO ຂອງໄທ ໄດ້ຍື່ນ ຫນັງສື ຕໍ່ ສຖານ ທູດລາວ ທີ່ ບາງກອກ ໃນ ກໍຣະນີ ການຫາຍ ສາບສູນ ຂອງ ທ່ານ ສົມບັດ ສົມພອນ ອີກໃຫມ່.
ໃນຕອນເຊົ້າ ຂອງ ມື້ວັນທີ 15 ມີນາປີ 2013 ຫລາຍອົງການ ທີ່ບໍ່ຂຶ້ນ ກັບ ຣັຖບານ ໃນໄທ ຮ່ວມທັງກຸ່ມ ເຍົາວະຊົນ ລຸ່ມແມ່ນ້ຳ ຂອງປະມານ 40 ຄົນ ໄດ້ພາກັນ ໄປຮວມໂຕ ຢູ່ຕໍ່ຫນ້າ ສະຖານທູດລາວ ທີ່ບາງກອກ ເພື່ອຍື່ນຫນັງສື ສະແດງ ຄວາມເປັນຫວ່ງ ແລະ ຮຽກຮ້ອງໃຫ້ ຣັຖບານ ລາວເລ່ັງສືບສວນ ການຫາຍສາບສູນ ຂອງ ທ່ານ ສົມບັດ ສົມພອນ ໃນວັນຄົບຮອບ ສາມເດືອນ ທີ່ ທ່ານຖືກ ລັກພາໂຕ. ດັ່ງຕົວແທນ ທ່ານນຶ່ງ ກ່າວວ່າ:
"ໃນຖານະ ພົລເມືອງ ຂອງປະເທດ ລຸ່ມແມ່ນ້ຳຂອງ ອາຊຽນ ແລະ ສະມາຊິກ ຂອງ ປະຊາຄົມ ໂລກ ຂ້າພະເຈົ້າ ຂໍຮຽກຮ້ອງ ໃຫ້ທ່ານ ສັ່ງການ ໃຫ້ຫນ່ວຍງານ ທີ່ກ່ຽວຂ້ອງ ດຳເນີນການ ຢ່າງຮີບດ່ວນ ແລະ ໂປ່ງໄສ ໃນການ ສືບສວນຫາ ການລັກພາໂຕ ຂອງ ທ່ານ ສົມບັດ ສົມພອນ ເປີດເຜີຍ ຂໍ້ມູນ ຄວາມຄືບຫນ້າ ໃນການ ສືບສວນ ສອບສວນ ຢ່າງຄົບຖ້ວນ ແກ່ຄອບຄົວ ຂອງສົມບັດ ແລະຄົນອື່ນໆ ທີ່ຄວນໄດ້ຮັບ".
ນາງກ່າວ ຕໍ່ໄປວ່າ ການລັກພາໂຕ ຂອງ ທ່ານ ສົມບັດ ສົມພອນ ເປັນອາສຍາກັມ ຕໍ່ສັນຕິພາບ ແລະ ຄວາມຫມັ້ນຄົງ ຂອງປະເທດ ລຸ່ມ ແມ່ນ້ຳຂອງ ແລະ ເປັນສີ່ງ ກີດຂວາງ ຕໍ່ການພັທນາ ພູມີພາກ ອີກທັງເປັນ ການລະເມີດ ສິດທິມະນຸດ ຂັ້ນພື້ນຖານ ແລະ ກໍເປັນເຫດການ ທີ່ຈະຖືກ ແກ້ໄຂ ຢ່າງຮີບດ່ວນ ຈຶ່ງຢາກຂໍ ໃຫ້ຣັຖບານ ລາວ ຮັບຮອງ ວ່າຈະຊອກ ຫາຕົວ ທ່ານສົມບັດ ຢ່າງຈິງຈັງ ເພື່ອສົ່ງໂຕ ທ່ານກັບຄືນມາ ສູ່ຄອບຄົວ ຂອງລາວ ໃຫ້ໄດ້.
ຫລັງຈາກ ກຸ່ມດັ່ງກ່າວ ສິ້ນສຸດ ການຮຽກຮ້ອງ ກໍໄດ້ພາກັນ ຍື່ນ ຫນັງສື ແກ່ທ່ານ ພູຄຳ ຫລວງຈິນດາວົງ ເລຂາທູດລາວ ປະຈຳບາງກອກ ຫລັງຈາກ ໄດ້ຮັບຫນັງສື ຄຳຮຽກຮ້ອງ ແລ້ວ ທ່ານພູຄຳ ກໍໄດ້ຍ່າງ ກັບຄືນເຂົ້າ ສະຖານທູດ, ປະຕິເສດ ທີ່ຈະໃຫ້ ສຳພາດ ແກ່ກຸ່ມດັ່ງກ່າວ.
ສົ່ງໄປເພິ່ນກໍ່ບໍ່ອ່ານອອກ
