ພິທີປະກາດການແຕ່ງຕັ້ງຜູ້ຮັກສາການຊົ່ວຄາວ ເລຂາຄະນະບໍລິຫານງານພັກ ເຈົ້າຄອງນະຄອນຫຼວງວຽງຈັນ ຈັດຂຶ້ນໃນວັນທີ 29 ພຶດສະພາ ທີ່ຫ້ອງວ່າການປົກຄອງນະຄອນຫຼວງວຽງຈັນ ໂດຍການເຂົ້າຮ່ວມຂອງສະຫາຍ ດຣ. ບຸນປອນ ບຸດຕະນະວົງ ກຳມະການກົມການເມືອງສູນກາງພັກ ຫົວໜ້າຫ້ອງວ່າການສູນກາງພັກ ມີສະຫາຍຄະນະປະຈຳພັກ ຮອງເຈົ້າຄອງນະຄອນຫຼວງວຽງຈັນ ຄະນະພັກ ພ້ອມບັນດາພາກສ່ວນກ່ຽວຂ້ອງ.
ອີງຕາມມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 56/ຄລສພ ລົງວັນທີ 21 ພຶດສະພາ 2014 ວ່າດ້ວຍການແຕ່ງຕັ້ງຜູ້ຮັກສາການຊົ່ວຄາວ ເລຂາຄະນະບໍລິຫານງານພັກນະຄອນຫຼວງວຽງຈັນ ແລະ ດຳລັດຂອງທ່ານນາຍົກລັດຖະມົນຕີ ສະບັບເລກທີ 187/ນຍ ລົງວັນທີ 29 ພຶດສະພາ 2014 ວ່າດ້ວຍການແຕ່ງຕັ້ງຜູ້ຮັກສາການຊົ່ວຄາວ ເຈົ້າຄອງນະຄອນຫຼວງວຽງຈັນ ໂດຍໄດ້ແຕ່ງຕັ້ງເອົາສະຫາຍ ສົມວັນດີ ນາຖາວົງ ເປັນຜູ້ຮັກສາການຊົ່ວຄາວ ເລຂາຄະນະບໍລິຫານງານພັກ ນວ ເຈົ້າຄອງນະຄອນຫຼວງວຽງຈັນ.
ໃນໂອກາດດັ່ງກ່າວ ສະຫາຍ ບຸນປອນ ບຸດຕະນະວົງ ໄດ້ໂອລົມຕໍ່ການນຳຄະນະພັກ ອົງການປົກຄອງນະຄອນຫຼວງວຽງຈັນ ການແຕ່ງຕັ້ງຜູ້ຮັກສາການຄັ້ງນີ້ ແມ່ນເພື່ອເປັນການຕອບສະໜອງໃນການຊີ້ນຳໆພາວຽກງານໃນຕໍ່ໄປ ກົມການເມືອງສູນກາງພັກໄດ້ປຶກສາຫາລື ແລະ ໃຫ້ການຊີ້ນຳໃນການຄົ້ນຄວ້າຜູ້ທີ່ມາເຮັດວຽກປ່ຽນແທນ ເນື່ອງຈາກໜ້າທີ່ການເມືອງຂອງພັກ ຍາມໃດກໍ່ມີຄວາມຮຽກຮ້ອງຕ້ອງການ ແລະ ບໍ່ສາມາດຂາດໄດ້ ດັ່ງນັ້ນ ໃນໄລຍະທີ່ຍັງບໍ່ສາມາດຄັດເລືອກຜູ້ທີ່ຈະມາເປັນໄດ້ຢ່າງສົມບູນ ນັ້ນ ຈຳເປັນຕ້ອງໄດ້ແຕ່ງຕັ້ງຜູ້ຮັກສາການຂຶ້ນ.
ນອກນັ້ນ ສະຫາຍຍັງໄດ້ເນັ້ນໃຫ້ເອົາໃຈໃສ່ສືບຕໍ່ສຶກສາອົບຮົມ ດ້ານການເມືອງແນວຄິດ ຕິດຕາມກວດກາຕອບໂຕ້ຂໍ້ມູນຂ່າວສານທີ່ບິດເບືອນຄວາມຈິງ ທີ່ສະແດງເຖິງການໃສ່ຮ້າຍປ້າຍສີ ການແບ່ງແຍກ ແລະ ອື່ນໆ ພ້ອມນັ້ນກໍ່ຍັງຮຽກຮ້ອງໃຫ້ສືບຕໍ່ເອົາໃຈໃສ່ ຊີ້ນຳໆພາວຽກງານຮອບດ້ານຂອງນະຄອນຫຼວງວຽງຈັນ ເພື່ອເຮັດໃຫ້ການຈັດຕັ້ງປະຕິບັດວຽກງານໃນແຕ່ລະຂະແໜງການ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ຄຽງຄູ່ກັບການສ້າງຂະບວນການກະກຽມກອງປະຊຸມໃຫຍ່ຂັ້ນເມືອງ ໃຫ້ໄດ້ຮັບຜົນສຳເລັດ.
still be acting Minister??
